Abuztuko egutegia Gipuzkoako parketxeetan

2022 / 08 / 01
Abuztuko jardueren taula

UDARAN HOBE NATURA-PARKEETARA HONDARTZARA BAINO

Mendiko freskuraz eta lasaitasunaz gozatuz sentipen berriak izateko egitarau oparoa eskaintzen dute Gipuzkoako parketxeek

(Hernani, Gipuzkoako Parketxe Sarea fundazioa, 2022/07/29). Sarritan esan ohi da mendia eta itsasoa elkarren ondoan egotea dela Gipuzkoaren ezaugarri erakargarrienetako bat. Hondartzara joatea, baina, ez da lantegi erraza izaten behin baino gehiagotan. Hasteko, ahal dela, eguraldi eguzkitsua izatea komeni da; gero, (ordaindutako) aparkalekua aurkitu behar da edo, bestela, jendez gainezka doan autobus edo trena hartu. Hori gutxi balitz, tokia aurkitu behar da hondartza bete baino lehen, beti ere itsasbeheran, jakina.

Hondartzarekin alderatuz gero, mendiak baditu zenbait abantaila: ez du zertan giro eguzkitsua izan behar; are gehiago, eskatzen hasita, hobe pixka bat lainotua badago. Arruntean, ez da aparkatzeko arazorik izaten. Eta, hori bai, nahi adina leku izaten da, ez dago eragozpenik alde horretatik, ezta ondokoen zaratak aztoratzeko arriskurik ere.

Gure inguruko mendiek, zer esanik natura-parkeek, eskaintzen duten erosotasuna aprobetxatu nahi dutenentzat, Gipuzkoako parketxeetan egitarau oparoa dago uda honetan, adin tarte eta zaletasun guztientzat ezin egokiagoa dena.

Iparraldetik hasita, Oiartzungo Arditurriko meategietara tren berdean joan daiteke asteazkenero. Aiako Harriko natura-parketik atera gabe, Errenteriako Listorreta inguruan oraingoan, txango gidatuak izango dira udako abenturen egitarauaren barruan.

Pagoeta natura-parkean erleen unibertso zirraragarria bertatik bertara erakutsiko zaie Iturraranera hurbiltzen diren guztiei. Ondoan dagoen Agorregiko burdinola eta errotetara bisitak ez dira faltako, betiko moduan. A zer freskura!

Ataunen, Barandiaran museoan eskaintzen diren mitologiarekin loturiko jarduerez gainera, txango gidatua izango da Lizarrustitik Lareora. Bidean parte-hartzaileek Lareoko koban sartzeko aukera izango dute.

Zegamako Anduetza parketxean badago zer ikusi eta zer ikasi. Astebururo hango xiloteka irekiko da eta, parketxetik kanpo, besteak beste, Aizkorri-Aratz natura-parkean dagoen Leizarrateko (San Adriango) sekretuak erakutsiko dira. Orobat, Legazpin (Aitzondon) dagoen Gipuzkoako haritz kandugabeen baso handienaz gozatzeko txango gidatua izango da.

Eta Arantzazun zer? Alderdi hartako paisaia liluragarri bezain indartsuak sentitzeko jarduerak antolatu dira, parketxearen ondotik igarotzen den ibilbide irisgarritik abiatuta.

Hori guztia gutxi balitz, lau natura-parkeetako parketxe guztietan familientzat bereziki egokiak diren orientazio jolasak izango dira, tokian-tokian gai ezberdinak ardatz izango dituztenak.

Egunak, orduak nahiz bestelako xehetasunak ezagutzeko eta norberak gustuko duen jardueran izena emateko gipuzkoanatura.eus web gunea erabiltzea gomendatzen dute antolatzaileek, baina telefonoz ere hots egin daiteke.

Honenbestez, hondartzara joateko moduko eguraldia egiten ez duenean (alegia, lautatik hirutan) edota, egun eguzkitsua izan arren, mendiko freskuraz eta lasaitasunaz gozatu nahi denean, gogora bedi eskaintza oparoa dagoela Gipuzkoako parketxeetan udara honetan.