Ataun 2020/07/01) Igande honetan, uztailaren 5ean, gure inguruan bizi diren hegazti harrapari espezie berezi bat hurbiletik ezagutzeko aukera eskainiko da Lizarrusti parketxean. Izan ere, Igeldoko Arrano Etxean sendatutako bi zapelatz askatuko dira bertan.
Askatu aurretik, hegazti hauen bizitzari buruzko hainbat azalpen emango dira eta baita Arrano etxean egiten duten lanaren ingurukoak ere.
Gipuzkoako Parketxe Saretik antolaturiko jarduera honen hitzordua goizeko 11:0etan izango da eta 45 minutu inguruko iraupena izango du.
Taldeak partaide-kopuru mugatua izango du eta nahitaezkoa izango da aurrez izena ematea. Musukoa (markarilla) eramatea ere nahitaezkoa izango da, nahiz ahal den guztietan segurtasun-distantzia mantenduko den. Adin guztientzako herritarrei zuzendua dago, eta prezioa pertsonako 3 €-koa izango da.
Izena emateko edo informazio gehiago eskuratzeko:
943 180335 / 688 89 50 69
barandiaran@gipuzkoanatura.eus
www.gipuzkoanatura.eus