Landare Berezien 18. Azoka apirilaren 23an eta 24ean

2022 / 04 / 23
Landare Berezien 18. Azoka kartela

Landare Berezien 18. Azoka

Aurtengo udaberriak, Aiako udalak eta Aldundiak antolaturiko Iturrarango Landare Berezien Azoka itzuliko digu apirileko azkeneko asteburuan, apirilaren 23an eta 24an zehazki. Azken bi urteetan pairaturiko egoerak ez zuen azokaren aurrez aurreko ospakizuna baimendu, baina aurten azokaren 18. ekitaldia ospatuko da Iturrarango Lorategi Botanikoan.

Iturrarango azoka “berezi egin ohi duten ezaugarriei"  eutsiko zaie aurten ere. Landareen kalitatea eta barietatea lehenetsiko dira, erosketarako aukera zabala aurkeztuko da, eta landare ikusgarriak eta espezie bitxiak ikusgai izango dira, besteak beste.

www.gipuzkoanatura.eus, web orrian azokan parte hartuko duten mintegien inguruko informazio guztia eskuratzeaz gain, haietako bakoitzaren eskaintza osoa eta harremanetarako bide zuzenak ere aurkitu ahal izango dira. Hartara, mintegi bakoitzaren altxorrik ederrenak Iturraranen eskuratzeko aukera bermatuz.

Kontinente guztietako landare eta loreak ezagutu eta erosteko aukera paregabea eskainiko du beste behin Iturrarango Landare Berezien Azokak. Hala, Frantzia, Espainia eta Euskal Herriko 47 mintegik beren aleak ikusgai eta salgai jarriko dituzte. 

Finean, aurten ospatuko den 18. Landare Berezien Azokan, 2003. urtean abian jarritako ekitaldiaren helburuari eutsiz, lore aukera zabala eskainiko da: horietako asko gure baratzetan, leihoetan eta lorategietan ezagutzen ez direnak, ingurumenarekin errespetuz jokatzen duen eskulangintzako jarduerak erabiliz bakarrik lortzen direnak.