EUROPARC federazioaren ekimenez, maiatzaren 24an Europako natura-parkeen eguna ospatuko da. Urteurren honek duela mende bat baino gehiago Suedian Europako lehen parke nazionalak izendatu izana gogorarazten du.
Egun berezi honi merezi duen garrantzia emateko, Gipuzkoako Parketxe Sarea fundazioak orientazio jolasak antolatu ditu Gipuzkoako lau natura-parkeetan maiatzaren 27an nahiz 28an. Jarduerak familian edo taldean egiteko atonduak daude eta askotariko gaiak izango dituzte ardatz: Intxisuak (Arditurri, Oiartzun), landaretza (Iturraran, Aia), mitologia (Barandiaran museoa, Ataun), basoa (Anduetza, Zegama), animaliak (Arantzazu, Oñati).
Parte-hartzaileek inguruko kultur paisaiei eta natura ondareari buruzko galderei erantzun beharko diete ibilbidean zehar aurrera egin ahal izateko eta, bide batez, orientazioaren (ipar-orratzaren…) oinarrizko ezagutza bereganatuko dute. Familia edo talde guztiek opari bat jasoko dute bukaeran.
Europako natura-parkeen eguna ospatzen dela-eta jarduera horiek guztiak doakoak izango dira. Ituraranen 27an, larunbatez, izango da orientazio jolasa eta gainetiko parketxeetan 28an, igandez, toki guztietan goizeko 11tatik aurrera. Izena ematea ezinbestekoa da.
Informazio xehatua jasotzeko, jo gipuzkoanatura.eus web orrira.