Saguzarren mundu harrigarria ezagutzeko eta sendatutako hegaztiak askatzeko saioek nahiz natura-parkeko altxorrez gozatzeko txangoek osatzen dute aurtengo egitaraua
Urtero legez, Aiako Harria natura-parkean, Errenterian dagoen Listorretako aisia-gunea ezagutzera emateko eta balioztatzeko hainbat jarduera berezi antolatu ditu, Errenteriako Udalarekin elkarlanean, Gipuzkoako Parketxe Sareak.
Uztailaren 19an, ostiralez, izango da lehen saioa. Lander Olasagasti adituaren eskutik, saguzarren mundu harrigarria hurbiletik ezagutzeko aukera izango da egun horretako ilunabarrean. Espezie horri buruzko oinarrizko azalpenak jaso ostean, parte-hartzaileek, detektagailu berezi batzuk bitartez, saguzarrak «entzuteko» parada izango dute, baita, inguruneari adi behatuz gero, haietakoren bat ikusteko ere. Saguzarrak gurekin batera bizi diren ugaztun hegalari ezezagunak dira. Hain zuzen ere, «abentura» honen bitartez, ingurumenean egiten duten ekarpenaren berri eman nahi da. Jarduera euskaraz eta gaztelaniaz izango da.
Uztailaren 28an, igandez, Foru Aldundiaren Basabizi zentroan sendatutako hegaztiak askatuko dira. Saioan Aldundiko Basa Animali eta Landareen Zerbitzuko teknikariek (basozainek) libratuko diren hegaztiei, Basabizi zentroan egiten den lanari eta zauritutako animalia bat aurkitzean egin beharrekoari buruzko azalpenak emango dituzte, bi hizkuntzetan eman ere.
Abuztuaren 15ean eta 24an, azkenik, Aiako Harria natura-parkea ezagutzera emateko bi jarduera antolatu dira. Listorretatik hasita, parkeko altxorretako batzuk gertutik ezagutzeko parada izango da ibilaldi erraz eta motz batean.
Jardueraotan parte hartzeko, 943494248/688895068 zenbakietara deitu edota arditurri@gipuzkoanatura.eus helbidera mezua idatzi behar da aldez aurretik.