Hiru Tenpluen ibilbidea / Ignaziotar Bidea
San Ignazio Loiolakoaren pausoei jarraikiz, GR-120 ibilbideak aukera polita eskaintzen digu Loiola eta Arantzazu arteko bidea Antioko Baselizan barrena egiteko. Bide horri Hiru Tenpluen Ibilbidea esaten zaio. Ibilbideak Urola Kostako, Goierriko eta Debagoieneko inguru eta bazter ederrak zeharkatu eta eskualdeko hiru monumentu adierazgarriak lotzen ditu: Loiolako Santutegia (Azpeitia), Antioko Baseliza (Zumarraga) eta Arantzazuko Santutegia, Aizkorri-Aratz Parke Naturalean kokatua.
Bizkar ibilbidea: Leintz Gatzaga - Arantzazu
Mutrikutik Arantzazura doan mendi Ibilbide Luze (GR) hau Gipuzkoaren eta Bizkaiaren arteko mugatik doa: Kantauri itsasoa Aizkorri-Arazko Natur Parkearekin lotzen du. Deitura egoera horri zor dio, bidea, mugatik, bizkarrez bizkar baitoa eta Bizkaia izena ere "bizkar"etik datorrelako. Xenda honetan zehar Arno KBEa igaroko da eta baita industriaguneak ere, lurraldeari hainbat urtetan indarra eman diotenak: aspaldiko gatzagetatik hasita gaur egungo altzairu lantegietaraino, labe garaiak ahaztu gabe.
Ezkutuko bidea
Aberastasun natural handiak eskaintzen dituen ibilaldi honetan Arantzazuko arroila eta Iturrigorri eta Bellotzako baso-zelaiak ezagutuko ditugu.
Arrasate-Arantzazu erromesbidea
Aspaldiko erromesbide hau Bedoña (Arrasate), Larrino (Aretxabaleta) eta Urruxola-Arantzazuko (Oñati) lurretatik igarotzen da, Urkuluko urtegiaz gozatzeko aukera eskainiz eta Jaturabe eta Arantzazuko arroilak jarraituz.
Oñati Mendebaldea: Garagaltza auzoari itzulia
Oñati haranaren ikuspegi interesgarri eta ezezaguna erakusten digu ibilaldi honek, herrigunetik hasita Garagaltza auzoko baserri-multzoetara eramaten gaitu, oraindik herri inguruan gelditzen diren azken bidezidor eta burdibideak erabiliz.
Oñati Ekialdea: Aloñapeko ibilbidea
Ibilbide klasiko honek Oñati herriaren ikuspegi ugari eskaintzen dizkigu. Gune historikoan hasi eta baserri auzoetatik pasatzen da, haranaren aberastasun natural eta etnografikoak agerian utziz
Larrez larre
Arantzazuri sona handia eman dizkio arteak eta kulturak. Horrek itzal handia egin izan dio, maiz, santutegiaren kokapen geografikoak tokiari ematen dion indarrari. Ibilbide honetan ikusi daiteke ingurune horren aberastasuna, ikuspegi bikainekin eta zabalekin, natura eta ofizio zaharrak uztartzen dituen ibilbidean.
Uraren bidea
Oñatiko inguruak ezagutzeko ibilbide konpletoa da Uraren bidea. Naturak eta gizakiek eraikitako hainbat elementu ikus daitezke bidean, baita sai arreak ere. Izan ere, duen fauna eta flora aberatsagatik dago babestua parkea. Lope de Aguirre konkistatzaile ezagunaren eta gogorraren ustezko jaiotetxea ere bidean dago, baita San Miguel herriko zaindariaren omenez eraikitako ermita ere, beraz ez dago buelta ez emateko aitzakiarik, ezta dragoiren bat agertzen bada ere.
Kontrabandisten bideak
Urak harriak oharkabean mugitzen eta higatzen dituen moduan aritzen ziren inguruetako kontrabandistak estraperloan, ingurune Karstiko honetan. Koba, bide eta zuhaitz artean ederki moldatzen ziren, bazterrak inork ez bezala ezagutzen baitzituzten. Gaur egun galtzeko arriskurik ez du izango ibiltariak, bidea argi markatua baitago.