Hartzaren Urratsa Araotz-Oñati
Oñatiko Araotz auzoan ekingo diogu laugarren etapari. Lehenik Jaturabeko urtegira joko dugu errepide bazterretik eta Arrikrutzeko kobaren sarreraraino hurreratuko gara, handik baserri-bideetatik zehar Arantzazuko santutegira iristeko. Hemen hasiko da gaurko aldaparik latzena, Biozkorniako lepora ailegatu arte ez baitugu atsedenik izango. Bizkorniatik aurrera, ordea, dena beherantz egitea tokatu zaigu, Kataberaraino lehenengo eta, bide zaharrak erabiliz, Oñatiko Murgia auzoraino ondoren. Hutsa falta zaigu Oñatiko herrigunera heldu eta etapa amaitzeko.
Hartzaren Urratsa Arrasate-Gatzaga
Arrasateko Monterron parkean hasiko dugu bigarren etapa hau. Herrigune zaharra atzean utzi, San Andres auzorantz abiatu, autopista azpitik pasatu eta aldapari helduko diogu, Bedoñara iritsi arte. Handik beherantz, Larrino auzotik igaro eta gero, erraz ailegatuko gara Urkuluko urtegira. Jarraian, Aretxabaletako Areantza auzoa Eskoriatzako Mendiolarekin lotuko dugu eta auzo-bideetatik ia beheko kaleraino hurbilduko gara. Azkenik, aldapan gora Atxorrotzeko tontor ermitaduna harrapatu ondoren, goitik behera Leintz-Gatzagako hiribildu historikoraino joko dugu etapa amaitzeko.
Hartzaren Urratsa Gatzaga-Araotz
Aizkorri-Aratz Parke Naturalean barneratuko gaituen hirugarren etapa menditsu honi Gatzagako herrian emango diogu hasiera. Gatz Museotik pasatu ondoren, Dorletako santutegiraino igoko gara, baina aldatsa ez da hor bukatuko, Makatzagain aldera inguratu arte, pagadi artean gora egin beharra dago eta. Handik Leizargarateko lepora heldu eta Deguriako zabalguneraino jarraituko dugu. Andarto mendiaren azpitik igaro eta Ugastegira iristean, Oñatiko Araotz auzoraino jaitsiko gara etapa burutzeko.
Peribidea
Ibilbide honekin, landa eremuko paisaia atlantikoan txertaturiko Gaintza eta izaera hiritarra duen Ordizia lotuko dituzu. 500 urte baino gehiagoan, gure arbasoek bidezidor hauek erabili zituzten bi mundu horiek lotzeko. Peribidea ez dugu ulertu behar bide bakar gisa, bide-sare gisa baizik: Gaintza, Baliarrain, Altzaga eta Aramako herrigune eta baserriak haien artean lotzen zituen bide-sarea zen; baita Goierriko gune industrial eta komertzialekin lotzekoa ere.